Sigmundur Davíð, þér er hér með sagt upp störfum!

Engar eignir fundust í þrotabúi KSR ehf. eignarhaldsfélagi Boga Óskars Pálssonar, fyrrum stjórnarmanns Exista og mágs Sigmundar Davíðs Gunnlaugssonar forsætisráðherra. Félagið átti stóran hlut í Exista. Ríflega sex milljarða króna skuldir félagsins voru færðar niður eftir hrun. Málaferli Arion banka gegn Boga standa enn yfir vestanhafs.

Sex milljarða skuldir voru færðar niður

Skiptum búsins lauk 6. ágúst síðastliðinn. Lýstar kröfur voru tæplega 308 milljónir króna. Bogi er bróðir Önnu Sigurlaugar Pálsdóttur, eiginkonu Sigmundar Davíð Gunnlaugssonar forsætisráðherra. Hann var enn fremur formaður viðskiptaráðs frá 2000 til 2004.

Félagið KSR ehf. hét áður Stofn ehf. og var eignarhaldsfélag Boga og fjölskyldu sem hélt utan um hlutabréf í Exista upp á 4,8 milljarða króna, sem urðu verðlaus við efnahagshrunið. Nafni félagsins var breytt 26. mars síðastliðinn, tuttugu dögum áður en héraðsdómur úrskurðaði að taka skyldi búið til gjaldþrotaskipta.

Bogi var um tíma stjórnarmaður í Exista. DV greindi frá því árið 2012 að 6,3 milljarða króna skuldir félagsins hafi verið færðar niður að fullu þegar hluti lánasafns gamla Kaupþings var fluttur yfir í Arion banka í kjölfar hrunsins árið 2008.

Styrkti stjórnarflokkana

Rekja má auð Boga til fyrirframgreidds arfs frá föður hans, Páli Samúelssyni, sem hagnaðist um sjö milljarða króna árið 2005 þegar hann seldi Toyota-umboðið á Íslandi til Magnúsar Kristinssonar. Bogi var nokkuð fyrirferðarmikill fyrir hrun og má þar nefna að hann greiddi næstmest allra Reykvíkinga í opinber gjöld árið 2004.

Fyrrnefnt félag Boga, Stofn, styrkti bæði Framsóknarflokkinn og Sjálfstæðisflokkinn um þáverandi hámark fjárframlaga, 300 þúsund krónur, árið 2009. Mágur Boga, Sigmundur Davíð Gunnlaugsson, var kjörinn formaður Framsóknarflokksins í janúar 2009. Það ár var þegar ljóst að eignir félagsins í Exista væru í algeru uppnámi. Óvíst er hvort félagið hafi styrkt flokkana áður, þar sem fjölmörg fyrirtæki óskuðu eftir nafnleynd vegna stjórnmálastyrkja. Þó er ljóst að félag Boga hefur ekki styrkt flokkana eftir árið 2009, en raunar hefur lítið sem ekkert farið fyrir Boga á Íslandi eftir hrun. Flestir styrktaraðilar Framsóknarflokksins á árunum 2002 til 2006 óskuðu eftir nafnleynd, samkvæmt samantekt Ríkisendurskoðunar.

Lánssamningur minnir á Stím

Samkvæmt ársreikningi Stofns árið 2008 voru skuldir félagsins lækkaðar úr sjö milljörðum króna niður í um 1,6 milljarða króna frá árslokum 2007 til ársloka 2008. Í sömu ársreikningum kemur fram að verðbréf félagsins, bréf í Exista ásamt öðrum, hafi lækkað um ríflega 4,6 milljarða króna á þessu tímabili og var verðmæti Exitstabréfanna komið niður í 300 milljónir króna.

Athygli vekur að í ársreikningum kemur fram að félagið hafi ekki mátt selja bréfin nema með heimild Kaupþings. „Verðbréfaeign félagsins sem bókfærð er á 428 milljónir króna er veðsett fyrir eftirstöðvum langtímalána í árslok. Eftirstöðvar lánanna námu á sama tíma 1.122 milljónir króna. Þá eru kröfur í lánssamningum um að ekki er heimilt að selja verðbréfin án heimildar bankans,“ segir í ársreikningi. Með öðrum orðum mátti Stofn ekki selja hlutabréf í stærsta hluthafa Kaupþings án sérstaks leyfis frá hinum sama banka.

Þetta skilyrði minnir á lánssamning eignarhaldsfélagsins Stím við Glitni. Það mál endaði með ákæru á þrjá menn; Lárusi Welding, fyrrverandi bankastjóra Glitnis, Jóhannesi Baldurssyni, einn stjórnenda bankans, og Þorvaldi Lúðvík Sigurjónssyni, fyrrverandi forstjóra Saga Capital. Aðalmeðferð í því máli hefst 16. nóvember næstkomandi.

Öll mál tengd Exista, utan máls Lýðs Guðmundssonar stjórnarformanns sem var dæmdur í átta mánaða fangelsi,  voru þó felld niður. Bogi var vitni í máli Lýðs.

Flögufléttan

Í október árið 2012 rann félagið BOP ehf., sem var í eigu Boga, inn í Stofn ehf. Bæði félög áttu það sameiginlegt að hafa átt hlutabréf í svefnrannsóknarfélaginu Flögu Group. Bogi var stjórnarformaður Flögu Group þar til það var selt.

Félaginu var slitið í lok árs 2011 en þar áður hafði það verið í frjálsu falli í Kauphöll Íslands frá 2007. Í upphafi árs 2009 voru þau varla pappírsins virði.

Þrátt fyrir þetta keypti bandarískt félag, Natus Medical, dótturfélag Flögu, Embla Systems, á ríflega tvo milljarða króna stuttu áður en félaginu var slitið. Við slit á Flögu runnu allar eignir félagsins til Emblu Systems, sem nú var orðið dótturfélag Natus. Ljóst er að þrátt fyrir vandræðagang Flögu um árabil þá hefur Bogi Óskar hagnast vel á sölu félagsins til Natus þar sem hann var meðal stærstu hluthafa.

Málaferli í gangi í Bandaríkjunum

Sala Boga var þó ekki óumdeild en árið 2012 var greint frá í DV að tvær stefnur hefðu verið lagðar fram gegn Boga, en Arion banki og fyrrum viðskiptafélagi Boga stefndu honum í Denver í Colorado í Bandaríkjunum. Samkvæmt Þjóðskrá er Bogi með lögheimili í Bandaríkjunum. Báðar þessar stefnur tengdust sölu Boga á Emblu til Natus Medical.

Eggert Dagbjartsson, fjárfestir sem dvalið hefur í Bandaríkjunum um áratugaskeið, stefndi Boga vegna sölu á Emblu, líkt og Arion banki, en þó undir öðrum formerkjum. Eggert átti stóran hlut í Flögu, 44 prósent, og segir hann að Bogi hafi aldrei sagt sér frá viðræðum um sölu á Emblu til Natus líkt og hann átt að gera þar sem Eggert var bæði hluthafi og stjórnarmaður.

Eftir því sem Stundin kemst næst starfar Bogi í dag sem framkvæmdastjóri félagsins SleepImage.

Bankinn áfrýjar

Arion banki taldi að Bogi hefði blekkt bankann og gerst sekur um fjársvik er hann keypti skuldir Flögu af bankanum með góðum afslætti árið áður. Bogi keypti 12 milljón dollara skuldir Flögu af bankanum á um 4 milljónir dollara. Aðeins þremur vikum síðar seldi Bogi dótturfélagið Emblu á 16 milljón dollara.

Samkvæmt stefnu Arion banka gerði Bogi samning við bankann í árslok 2008 í tengslum við fjárhagslega endurskipulagningu Flögu um að selja eignir Flögu til að borga niður skuldir við bankann. Þar kemur fram að sumarið 2011 greindi Bogi bankanum frá því að ekkert gengi að finna kaupendur á eignum Flögu. Þá hafði hann þó hafið samningaviðræður við fyrrnefnt félag, Natus, um kaup þess á Emblu. Þetta hafi verið brot á samningi og krefst bankinn þess að samningi um kaup Boga á skuldunum verði rift.

Arion banki tapaði málinu vestanhafs, en mun áfrýja.

http://stundin.is/frett/ardur-afskriftir-og-gjaldthrot-hja-boga/